Napenda kuwasalimu watu wote na pia kumshukuru Mwenyezi Mungu kwa pumzi anayoendelea kutupa ingawa kuna wenzetu waliotangulia mbele za haki kwa sababu tofauti tofauti lakini hiyo yote ni kazi yake haina makosa.
Chunusi ni aina ya vipele vinavyotokea kwenye uso wa binadamu hasa wakati wa kubalehe na Msasa ni aina ya kifaa kinachotumiwa na mafundi ujenzi katika kutolea vitu vinavyofanya sakafu isiwe katika msawazo.
Vitu hivi ni viwili tofauti kabisa na wala haviendani na ndio maana nahisi utakuwa unajiuliza kwa nini nimevihusisha sehemu moja lakini ukweli ni kwamba kuna dawa za chunusi ambapo ukiwaona wataalamu wa magonjwa ya ngozi watakusaidia kuweza kupata tiba sahihi hivyo kwa makala hii nimefananisha chunusi na vitu vinavyotokea juu ya sakafu au ukuta kwani nazo zinafanya sura isiwe katika hali yake ya kawaida. Ukitaka kuondoa chunusi huwezi kutumia Msasa lakini utatumia dawa kwani Msasa utamuumiza mtu na kupata madhara makubwa.
Baadhi ya wananchi wa Tanzania wanaonekana kutaka kutoa chunusi kwa Msasa ili kuwaumiza wananchi kwa ujumla kwani kitendo cha kuzomea na kutomtaka mwanachama wa Chama cha Mapinduzi (CCM) kuongea na kutoa hoja zake si kitendo cha kiungwana hata kidogo tena ukizingatia kinafanywa na wasomi wanaotegemewa na jamii hivyo kupinga usemi wa Wasomi wanabishana kwa hoja tena kwa kupokezana na si kupayuka kama kwenye klabu za pombe ya kienyeji.
Kulikuwa na makongamano baadhi yaliyoitishwa na UDASA pale Chuo kikuu cha Dar es salaam katika kujadili suala la kupata katiba mpya lakini katika kongamano zote kuna watu waliozomewa kwa kuongea hoja zinazoitetea serikali iliyopo madarakani na jana tena Mbunge wa CCM alizomewa pia kutokea kwa vurugu pale Dodoma ni viashiria tosha kuwa watu hatutaki kujenga hoja bali kujenga uhasama ndani ya mioyo ya watu watulivu.
Kwa jinsi nionavyo wananchi washajijengea kuwa Mtoto wa Nyoka ni Nyoka hivyo kuamini kila mwana CCM akisimama yatakuwa yaleyale tu lakini sivyo kwani nakumbuka Katibu wa CHADEMA, Dr Wilbrod Slaa alivyompigia debe Mh. Harrison Mwakyembe kipindi cha uchaguzi bila kuangalia chama hiyo ilitudhihirishia kuwa kuna watu wachapa kazi bila kuangalia wapo katika chama gani sasa nashangaa sisi tunavyokataa kuwasikiliza wana CCM.
Kuendelea kutumia njia tunayoendelea kuiamini ni kupotoka na kukosa mwelekeo wa kufikia vitu tunavyovihiyaji na kugeuka kelele za chura ambazo hazitamnyima Tembo kunywa maji bali tukikaa na kujua njia sahihi ya kutumia kwa kutumia usomi wetu huu huu naamini tutafanikiwa bila kutoa jasho jingi kama tunaloangaika nalo sasa hivi bila kujua hatima yetu ya mbeleni kwani wengi wetu tunapelekwa pelekwa tu bila kujua tuyafanyayo.
Hivyo njia tunayoitumia katika kudai haki ni sawa na Msasa ambao si jibu au dawa sahihi ya Chunusi ambazo ni kama matatizo tunayoyapigia kelele kila kukicha hivyo umoja tuliokuwa nao ni mzuri lakini kama hauna malengo imara na njia madhubuti hautasaidia kitu.
Imeandikwa na N.Mugittu
